Escolas de Educación Infantil de Paderne

Escola de Educación Infantil de Souto

A escola de Educación Infantil de Souto-Paderne está situada na parroquia de Souto e a súa construción data aproximadamente dos anos 70.

Trátase dunha construción de planta baixa en forma de ele. Consta de dúas salas con entradas independentes, unha  dedicada á escola e outra, máis grande, a actividades de psicomotricidade.

O patio da escola ten aproximadamente 80 metros e nel atópanse unha palmeira, unha randeeira para dous nenos/as e un tobogán. O chan está cuberto de pedra e a zona das randeeiras de cortiza. Ten un cerramento metálico.

A aula mide aproximadamente 50 m e o colgadoiro, aseos e almacén 18 m. Dentro da aula non hai puntos de auga, mais temos 2 nos aseos que se comunican directamente con esta. O chan é de tarima flotante.

A iluminación natural fórmana 6 ventás de aluminio e unha porta acristalada, que se abre cara a dentro, dúas pequenas  ventás nos aseos e outra ventá no almacén.

O mobiliario está en bo estado. As mesas e cadeiras son novas e de madeira.

A clase ten conexión a internet e na clase contamos coa PDI.

O cadro de persoal fórmano a titora, a mestra de inglés (que  tamén fai funcións de apoio na escola) e a mestra de relixión.

Tamén se realizará a actividade de psicomotricidade nas dependencias da Asociación de Veciños de Viñas, dous mércores cada mes. Esta actividade realizámola de forma conxunta as 3 escolas de Paderne.

As actividades extraescolares e complementarias, saídas e celebracións ao longo do curso escolar tamén se levan a cabo conxuntamente.

Escola de Educación Infantil de Viñas 

Este centro escolar está situado no lugar de San Pantaleón das Viñas, no Concello de Paderne. Nel impártese o 2.º ciclo de Educación Infantil (3, 4 e 5 anos).

Aínda que a escola está situada nun medio predominantemente rural, non se pode ignorar a influencia do contorno, pois está moi cerca de núcleos de poboación máis  urbanos (Miño, Betanzos...) e a principal dedicación das familias non é agrícola nin gandeira, senón que está máis ben encamiñada ao sector servizos.

A aula está moi ben equipada en todos os aspectos (o mobiliario é novo) e ten internet e encerado dixital con proxector.

Na escola hai clase de inglés dous días por semana e esta mestra tamén presta labores de apoio.

O recinto escolar consta dos seguintes espazos:

-Un edificio no que está a escola dunha parte e doutra un local similar que o Concello emprega como Aula de Usos  Múltiples.

-As vivendas correspondentes aos dous locais. Nunha delas o Concello imparte diferentes actividades extraescolares e a outra é utilizada como almacén pola escola.

-Un recinto exterior que dispón dun espazo verde con aparellos infantís e outra parte cuberta de grixo.

-Un pequeno patio cuberto pechado no que se gardan os materiais que usamos no recreo e nas clases de psicomotricidade.

Cada quincena as tres escolas do Concello nos reunimos no Local Social da Asociación de Veciños de Viñas para facer distintas actividades e para que os nenos teñan contacto entre eles.

Escola de Educación Infantil de Areas

A escola de Areas está situada no lugar do mesmo nome, e pertence á parroquia de Santiago de Adragonte. O edificio no que se sitúa construíuse no ano 1958 e desde aquela funciona como escola.

É unha construción rectangular coa aula na planta baixa e vivenda en desuso no andar superior. Está rodeada dun patio de recreo moi amplo con varias árbores distribuídas por el como camelias, un magnolio, unha moreira, un liquidámbar… Para que os nenos e as nenas xoguen hai unha alfombra con bambáns e tobogán.

A superficie da aula é dun sesenta metros cadrados, cun solo de tarima flotante. Antes de entrar nela temos os aseos e os  colgadoiros para os alumnos e alumnas.

A fachada principal ten sete grandes ventás que lle proporcionan unha boa iluminación natural. Ten bastante mobiliario. Dispón de conexión a internet e PDI.

O cadro de persoal fórmano unha mestra titora, unha mestra  especialista en lingua inglesa e unha mestra de relixión católica.

A actividade de psicomotricidade levámola a cabo nas dependencias da asociación de veciños de Viñas dous mércores cada mes. Facémola de forma conxunta as tres escolas de Paderne.

As distintas actividades extraescolares e complementarias, as saídas e as celebracións que facemos ao longo do curso, tamén se levan a cabo conxuntamente.

Responsables das Escolas de Educación Infantil de Souto, Viñas e Areas

Autoras: Susana García, mestra responsable da Escola de Educación Infantil de Souto, Yolanda Sánchez, mestra responsable da Escola de Educación Infantil de Areas e Clara Hermida, mestra responsable da Escola de Educación Infantil de Viñas